منتديات القلمونة
بقلوب ملؤها المحبة
وأفئدة تنبض بالمودة
وكلمات تبحث عن روح الاخوة
نقول لكِ أهلا وسهلا
اهلا بكِ بقلوبنا قبل حروفنا
بكل سعادة وبكل عزة

منتديات القلمونة
بقلوب ملؤها المحبة
وأفئدة تنبض بالمودة
وكلمات تبحث عن روح الاخوة
نقول لكِ أهلا وسهلا
اهلا بكِ بقلوبنا قبل حروفنا
بكل سعادة وبكل عزة

منتديات القلمونة
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

منتديات القلمونة

منتـــــديات القلمونة
 
الرئيسيةالرئيسية  البوابةالبوابة  أحدث الصورأحدث الصور  التسجيلالتسجيل  دخول  

 

 ديوان الشاعر عبدالله عبدالرحمن عبدالله

اذهب الى الأسفل 
2 مشترك
كاتب الموضوعرسالة
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:11 am

يا ساكنة فى ابراج عُلاك
يا ساكنة فى ابراج عُلاك

ولعتى جوفى ياسمحة نار
بهدلتِى جهَّلتى الوَقار
ضيقتى واسعةعلى خلااااص
ما حاشتك حكمة كبار
الريدة منى اتمكنت
ما ضُقت مِنِكْ غير صَغار
شايفانى ما مقدارهواك
قررتِى اكدتى القرار
**********
الدنيا باكر تسرقِكْ
ترميكى فى وادى البوار
ويرجِع الصى صرختك
تغشاكى كتاحة وعصار
تتمنى لو زول ينقذك
يحميكى قبل الاندثار
**********
يازولة خليك من هواى
وخليكى من شيبة ووقار
انا زول متيم بيك وبس
حارمنى من كلمة هِزار
بخاف عليكى من الزمن
يمنع نفيسك اعتذار
يا ساكنة فى ابراج عُلاك
بخاف عليكى الانحدار
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:12 am

الفُراق
سبحان من خلق الوِلِف
من نبعوا نرتوى نزدهر
وسبحان من خلق الفراق
آلامو للروح تعتصر
دايما ضعيف انا بعترف
من ساحة الراحلين بفِرْ
ودايما حنين بسرع بخف
لى ساحة الجاييين بكِرْ
معجون بطينة اشتهاء
بأوامر الشوق بأتمر
ومعطون فى محلول انتهاء
لو جيت أودع بحتضر
يا ريتا ايامى التقاء
تهدأ عواطفى وتستقر
ويا ريت يموت شبح الفُراق
ولا خاطرة ساكت يتذكر
الدنيا لو من غير وداع
ايه كان حيحصل تفتكر ؟!
ولو الفراق اتلاشى ضاع
رايعة الحياة كان تستمر
ولو القدر نزع القناع
من دنيا بيهو بتستتر
كان الأمان انداح وشاع
والحزن يفنى ويندثر
عالمنا من غير التياع
وجه الأمانى جميل نضِرْ
لكنها الايام تِباع
بالبلوى والخير تشتهر
سبحان من خلق الوِلِف
من نبعوا نرتوى نزدهر
وسبحان من خلق الفراق
آلامو للروح تعتصر
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:12 am

مابودع زول مسافر

ما بودع زول مسافر

أوعى ماتقول لى تودع
ما بودع زول مسافر
كلمة ما بقدر أقولا
ولحظة بِتهز المشاعر
الدموع تنزل خجولة
وكفى ليهو بمدو فاتر
ونفْسى مهزومةْ مُيُولا
فيها رهق الفُرقة ظاهر
خاضعة مُلتاعة وذلولا
أصلى ما بخفى وأكابر
وروحى فى توهان ذهولا
ما انقطع لأساها دابر
فينى احباطات مهولة
الوِلِفْ كتَّال وقاهر
حيرة فىالوجدان وهولة
الخيال والطيف بسامر

وأنا ليه اصلا عرِفْتَك
وانتَ سيف الفرقة شاهر ؟
وليه مع الانفاس دخلْتك
وما سمعتك همس زاجر ؟
وليه زى الازهار عشقتك
وزى فراش سايبنى حاير؟
وليه قساوة الفرقةعندك
لما انت خميل وزاهر ؟

فيكا حسن الخلق فطرة
لما جيت هليت بشاير
وكلِّما نمشيك لى بكرة
نكتشف فيك النوادر
كنتَ فى حاضِرنا عِبْرة
وكل زاير يوم بغادر


ومَهْما لى تشرح تشجع
وتسرد الاسباب تحاضر
ومْهما للكلمات ترصِّع
ولى تحفظها وتذاكر
وعد ما بتلقاهو منى
ما بقول ليك جاى حاضر
الوداع للروح بيضنى
سيل بيجرف قلبى هادر
الوداع قسوة وتجنى
غُصة والدمعات تعافر

الصدى النايح يرجِّع
كل همسات الخواطر
والشذى الفايح بوجِّع
قلبى ما بديهو خاطر
ومَهْما اتمالكت نفسى
الالم على حالى ظاهر

ببقى محشود فى حواسى
الذكريات الطيبة تَهَدِلْ
وكلِّ ماضى بشوفو هسى
ليهو ما بقدر ابدل
ببقى عايش جوه أمسى
بُكرة والآن ليها بهمل

أوعى ما تقول لى تودع
ما بودع زول مسافر


الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:14 am

يادوبى حسيت بالفَرِقْ
خليك معاى ات ماشى وين
يا شيل رويحتى معاك وروح
أنا والسنين راجين لقاك
يوم جيتنا ضمدت الجروح
يوماتى بتنفس هواك
أنا ليك جسد وبقيت لى روح
عطر حياتى بطيب شذاك
زيك ندى معدوم وسوح
بهواك انا وبرتاح معاك
كون ليا قيس بن الملوح
انا اصلى ما صدقت جيت
جبنة هواك ظبطها
وأديتا حبة جنزبيل
وساحة لقاك بخرتها
أنا ليا روح قاصداك عديل
غالبانى مهما زجرتها
وقريت فى فنجانك رحيل
اخفيتا طب كسرتها
وكتمت فى جوفى العويل
والدمعة طالعة حبستها
تمشى وتفارق مستحيل
ويلات فراقك ضقتها
قريت فى فنجانك رحيل
و جبنتى جاهزة دفقتها
وشديتا كفتيرة هواي
نعناع وقرفه مزجتها
وقلبت قعدة ريدنا شاى
ومديت لوكبايتين عِشِق
وسقيتو من شاى الغرام
سكر زيادة لمن شِرق
يا دوبى حسيت الفرق
جبنة شنو التسبك عشق
فى الشاى بتحالى الكلام
والجو نضيف ما بتحرق
تتهنى بالهوى فى سلام
والاكسجين ما بتمحق
يا دوبى حسيت الفرق
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:16 am

قمارى الوادى قوقن
لوشبك العِويش
والمسرة جات مطبوقة
قمارى الوادى قوقن
وبان الجمال فى طوقا
تمّالْنا المُنى
وكل زول نَزِفُوعشوقا
كتَّرْنا السعف
نضفنا من حنقوقا
بنينا البيوت
حيشانا ظاهر روقا
حجَّلنا القُعُور
نِسعاً نسعنا بى روقة
وهطْنا البُرام
لى خِشيما فيها دقوقة
طاحنين الدقيق
والويكة كوم مدقوقة
كبينا العجين
للقرقريبة تسوقا
والصاج لو حرن
مشينا بى طايوقة
وصوانى الضيوف
ممهولة مى ممحوقة
ودندنة القلوب
فرحانة بارد شوقا

الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:17 am

أهملتنى



اهملتنى... حتى
السؤال عنى اختفى
كأنى ما كنت الدوا
لا بلسم ايام الوفا
لاسلسبيل منو ارتويت
لا دوزنة ساعة صفا

والوردة لو فاتا الربيع
هبت عليها العاصفة
والريدة لو فقدت حنان
نسقيها من وين عاطفة
اهملتنى وسبت الحروف
الجاتنى منك الاطفا
عساها تتلطف تقول
الكان خلاص كُدرة وصِِفا



اهملتنى .......
واصبحت ما بترسل عتاب
وكأنى ما كنت الحبيب
البيهو ليل الوحدة طاب
يا هدأة العمر اللِفات
وسكون ليالى الاغتراب
ولحظات سعادة فقدتها
يا حسرة ديل كانن قُراب
كل الامانى العشتها فى
غفلة بس صارت سراب
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:18 am

انا مالى والهم



أنــا مــالى والـهـم والشـــــجـــن
مـحـبـوبــى وردانـــــى ورزيـــن
فــارش دريبــــــى شذى وعبــيـــر
ســـــــــاقينى من قلبــو الحنـــين
لطّف قســــــــاوة المـفــــــردات
مســــــح الأســـى وجُور الســــنين
بشــــبه مــلاك فــى عِـفــــتـــو
ونــــور القــمــــر من نورو.... وين !!
******
لـوقلــت لـــى أخلــص حـــــبيـب
صــدقنى بـــس زولــــــى الأمــين
واجـمــــل عيـون قـالـت كــــــلام
دى عيــون حبيبــى الباهــــــى زيـن
غيــرك مـنــو بيـعــــرف يحــــب
والــــريــده فيهو بتـســتـكــيـــن
********
أنـا مــالـــى والهـــم والــعـــذاب
عــالـــى المقــام فـــى الــفرقــدين
ياالفـــى دواخلــى شــــعور نبـيـــل
فــى كــل لحـظـة وكــل حـيــــــن
مــاأحـلــــى دنيـــا تضــمـنــــا
نـهـــــديـهـا أجمـــل وردتــــيـن
وكـــم رائعــة عـشـــــه تلــــمنـا
وصـــغــارنــــا فيـهــا مغـــرديـن
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:18 am

هل بتكتب؟
ايوه بكتب يا عزيزة
مرة للوالده البعيدة
وللصِحاب مرات برسل
كل يوم اشواق جديدة
وكل معارفى بخصهم
بالخطابات العديدة
وبرضى بكتب يا عزيزة
لكل طيبة سبانى ريدة
ولو بعيش ايام جديدة
لسه حا كتب للبريدة
ولو صارت الكلمات عنيدة
مامهم تطلع قصيدة
اى حاجة تكون شهيدة
انى ساهرت وكتبت
وفى هوى المريودة ذبت
وذكرى للتاريخ عملت
وعلى جدار الليل نقشت
أسمها واسمى ورسمت


هل بتكتب ؟
أيوه بكتب وانتى برضك
لوفى يوم جاتك رسالة
طويلة من انسان بحبك
شمعة ساهر يحكى ليكى
كيف حياتو ملاها شخصك
الامل عاد بيكى اخضر
والعمر ازدان وازهر
وكل شى فى حياتو نور
مش حتكتبى ياعزيزة
لا .......... بربك
الحبيب مستنى ردك
ايوه اكتبى انتى برضك
لى قريب او زول بحبك
فى البعاد اضناه حبك
راجى تصلو رسالة منك
فيها اى صغيرة عنك
ارتعاشاتك وظنك
اكتبى واعزفى لحنك
أملى كاسو وبرضو دنك
وغنى يا محبوبتو اصدحى
......... ورى فنك
مش حبيبك مش بريدك
اكتبى واختصرى اسمك
بكرة توصلو الرسالة
وفيها كم يتجلى رسمك
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:19 am

بغيب عنك

بغيب عنك واســــافر من
ديار حنك يــــا إنسانـــــــــه
بعادي أكيد بدون أختار
وتبكى عيوني سهرانـــــــة
أفوت منك..!! شنو الأقدار
يا قسمة عمري لاحقانــة؟؟!
*** *** ***
يا نسمة ليل بعد مطرة
ملت للقرية حيضــــــانــــة
وهبت في جبين أطفال
وفرحت والـــــــدة لهفانـــة
ودامت ليا بعد الحـــــــــال
ومـــا حرمتني تحنـــانـــه
************
بخــــاف لو بكره نتفارق
عيونك تبكـــــي ولـهـــانــــــه
ودوحات انسنا العامــــــــــــرات
تنعق فيهـــــا غربانـــــه
بدل بلبـــــــل صـــدح بالحب
وغــــــرد وزع الحــــانه
*** *** ****
بغيب عنك عشان ارجع
قريب منــــــك يــــا ريحـــانه
أشيل الزاد ونبدأ رحلة
الأمجــــــــــاد في دنيــــانـــــــا
عشــــان القاكي والآمــــــــال
بى لقاينـــــــا فرحـــــانه
*** *** ***
بدورك تكتــــمي العبـــــــرات
بزاد الصبر مليـــــــــــانــة
ولو كترت ليـــــــــك شوقي
وكــنتى طلبتى كتمانـــه
بكون يا روحي زاد الشـــــــــوق
غلب للغضة ريانــــة
*************
بغيب عنك ...عشان بكرة
عشـــــــان يا وردة نديانــــة
تجملي عشه الآمـــــــال
يا زينـــة يا روضه مزدانـــــــــة
بغيب عنك عشان بكرة
تكــــــــون بالغيبة لقيانــــــــــا
هناك فى جنه العشاق
هنـــــــاك آمالنـــا راجيانــــــــــا
ملـــــوك في حفلــــــة التتويج
ونحنـــــا معانا تيجــــــانه
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:19 am

أريج

يا حديقة جيتا راجع


كيف افوت نفسي وافارق


البلابل فيها شادية


عمرى خضرغصنو وارق


القلوب منحتنى طيبة


والامانى ابت تفارق


المشاعر ليا غنت


والامل لاح ليا بارق


بسمة واشراقات جميلة


والحنان مفروش نمارق


ولو مشيت وانا ليها بهوى


ببقى فى احزانى غارق


وطيف اريج دايما معايا


الشجن والنوح يلاحق


والحنين بمنع خطايا


والحزن يغشانى ساحق


ياحديقة فيها بسعد


والعشم جوايا باسق


يشفى روحى عبيرشذاها


ولى اريج ورداتا عاشق


والدروب لوليها صِعبت


بى حِداها اظل اساسق


بى جمال نوارا احظى او


بى نورا اضوى غاسق


وبقا نورا وفاح زهورا


طيب ونفح الورد عابقِ
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:19 am

السفيرة


لمـــا تزوري يا روعة
بحس بى عمرى كلو فـرح
يدندن حاضرى يشدو سعيد
ولى دمعات شـقاى يمسح
أغنــى الفات نغم تمـتم
طفـولة قضيتها حب ومرح
وترقص فى حياتى ســنين
تشــع فى عمري لو يسـمح
*******************
وقبـال ما النسـيم يغشـى
وقبال قلبـــى يتفتح
جلسـت فى حضرة آلامي
أفســر فى الهوى وأشـرح
ويـامـا حكـيت ومثلـت
بـدون جمهـور ودون مسـرح
***************
كتمت الحب غلبنــى وزاد
صحِـى الكتمان حلو وأسـمح؟
ولاّ الشكــوى للعاشـــق بكون
فيـــها الأمــان وأريح
بدور أســـمع كــلام حلوين
ورأيهم فــى الهوى أرجـح
وانتـى ســفيرة السـمحـات
ومن كل واحـدة فيــك ملمح
شــايف فيـك جمـال الكـل
وفيكـى قلـوب تهيـم تسـرح
فهل دومــاً تزورينــي
ويبقـى عذابـى بيك روّح ؟
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:20 am

حــــــــروف بتغنى


لو قلبي الولهـــــــــــــــــــان عانـــــــدنـي


وفات لى رمشـــك غصباً عنــــــى


سيبى الدهشــــــــة و ليـــــــــه خليتو..


. الريد و حياتك زاد و أمرني


كــــــــم سنوات حـــــــــــبك خبيتو


صبرت عليهــــــــــــــو أشــتّد غلبنــي


كتير حــــــــــــاولت أتحسس نبضك


ألقى الواقـــــــــــــع خيــــــــــب ظني


مره الحــــزن بشوفو كســـــــــــاكِى


ظروف قاســــــــــــــــيات منك تحرمني


و كـــــــــم مــــــــرات صمتك لفـاكــــي


و مرة عبيــــرك فــــاح انعـــشنـــى


واضـــــــــــح إنـــــــــــــى اسير دنياكى


وبيك مشغول حسنك شـاغلــــنى


مشـــاعــــر الـــــــــود الكــبرت


فــــيــنـى مابتطاوع أوامر منى


ايه بي ربــــــــــــك قولي اســـــــــــــــوى


غيــــــر ما احبك و كلي تمنـــــــى


اسلم امـــــــري و اخضـــــــع ليكي


و اكتب فيكي حــــــــــــــروف بتغني
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:20 am

لا تعتذر

الليل يحِل
وطيفك يهِل
أُنسك شهِي
بس لا يقِل
معسول كلام
صلباً يفِل
دا انا لي قليب
ولهان ثمِل
أأمر وذِل
بل أقسي صِِر
دا قساك حنان
امرك أمان
.. لا تعتذر
دا القلب راد
انتا الأمير
ليك بأتمِر
الوحدة بعدك تنحسِر
والفرحة وإياك تكتمِل
قول لي بحبك
ليه خجِل
لا تعتذر
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:21 am

عليك يسهِّل

من رياض حسنك مغادر
رغم انك زاهى مذهل
عشت فى وجدانى حاضر
كل يوم فى ايكى تهدل
كنت بى حسنك بفاخر
لما فى ساحاتى تقدل
**********
يا قليب بالريده ذاخر
لما تتواضع وتنزل
ما افتكرتك تبقى هاجر
والمشاعر الطيبة تهمل
جد لقيتك انتَ فاتر
كان ياريت احساسى تمهل
********
******
قلبى من شدة غرورو
السنين رجَّع يجهِّل
وخاطرى فى غمرة سرورو
فى قوافى الحب يِصهِّل
والامل غامرنى نورو
ونفسى ريدك عاد يؤهِّل
********
لما احكى البينى بينو
دمعى يتسابق نزولو
ليهو رسلت المشاعر
كنت بحكى الليل بطولو
اصلو ما كان بيا شاعر
ودمعى متزايد هطولو
*********
ربى سهِّل
عليهو مهِّل
اصلو قاسى
وبرضو مُذهِّل
ما بلومك قلبى حاشا
لو بقيت مهزوم جمالو
حتى لو ريدك تلاشى
وسِّبتَ محبوبك فى حالو
دارى نفسك وارتعاشا
ربى ما بمنع حلالو
الدنيا ما بتحرم دعاشا
الله بقسم ليك (بدالو )
عليهو سهل
وعليا مهل
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:21 am

الدكتورة


ياقلبى مالك والهوى


العشتو فى ريدن كفا


سامرت أحلى الأمنيات


جناتو ليك كم شّوفا


ساهرت أشقاكا وبكيت


ماطل حياتك وسوفا


وسقاكا فى الآخر رِهاب


جفف رياضك ونشفا


*******
دكتورة بين إيديك عليل


يارب بايدكى الشِّفا


قلبى الفراشة يحيرك


زهرات ربيعك والفا


وما كل ولُوف


بلقى الولِيف


ولا كل عليل


طِبك شفا


لكنى بهوى المُعجزات


وأنوار تقاكِى الكاشفه


*********
خصاك إلهك بالجمال


والرحمة فيك أجمل صِفة


جمبك متيم من جديد


عارفِك عطوفة ومُنصِفه


ممدود على خيوط الأمل


والماضى مِنو البال صِفا


وراجيكى بدعو مع السََحر


بختم دُعاى بالمُصطفى


آمين يتم أملى ومُناى


فى جنة بالحُب وارفه
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:21 am

شنو الحاصل ؟!

رجعت ونفسى ما طابت
ولا حبل الوِصال اتمد
كليمات العشم خابت
ووسدت الأمانى لحد
وبارح نفسى كل حبور
وفات نكران هوايا الحد

بتساءل شنو الحاصل ليه
حتى البجيبنى شرد
لاغيم الرجا هاطل
لابرقا برق برق لا رعد
وكل أمل بنيتو قصور
غِشاهو سونامى إتبدد

غفرانك مليك روحى
مسكت حروف إسيما عدد
وحصاد عصيانى فى الآخر
بقيت مقتول هواها كمد!
وبارحتِك دموع وجروح
بلولى هواك وبتوسد
وسنة ربى فى كونو
يجتاحنا الهوى ويشتد
يغادرنا الجديد يبلى
ومحال من تانى يجدد
نقدر ريدنا ونصونو
ولو فات نبكى نسهد
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:22 am

مين فكرِك(من الماضى)


مين فكرك تهدى الحروف
لي زول حياتو اتبدلت
عــاش الربيع بعد الجفاف
وايامو بسمت وخضــرت
فيض الحنان وشمس الربيع
سرف الامـانى النضرت
ومن الحدائق والرياض
رسـل الورود جات باركت
كل الاحبة فى كل مكان
دقات قلـــوبهم أبرقت
*** *** ***
و انتِ اللفيـك
حرم المعـاني القيمات ماعبرت
الغيرة لــيه ماكنت ليــــك
والريده ليه اتبدلـــت
فاكـــرانى إيه يا ريد زمان
ولا الامـــــانى إتبعـــثرت
*** *** ***
قلبــــــــــك على ما حنّ يوم
ولاحتى عينيك قـــــــــدرت
كـــــــان ياما كان نظرك حذر!
والابتســـــــامة الصَّفـــرت
ليه بس قسيتى جنيتى ليه
ســـــبتى الدمــــوع اتــقطرت
أه يااســى... واه ياودار...
روحـــىمن العذاب اتشـــــربت
الليلــــة ليه الجـــــــد إيه
كلمــــات غرام اتسطــــرت
فاكــرانى إيه ياريد زمــــــان
ولا الامــانى اتبعـثــــرت

كنت السنين راجيك أمين
آمالي فيك ما اتحققت
وحديقة القلب الهــــواك
للــساحة فاحت وعطرت
أنا والصبر راجين لقــاك
والدنيا حولنا ازهــرت
طـــال إنتظارنـا قسيتى ليه
جفت رياضنــا وأقـفـــرت
*** *** ***
مين فكرك تهدى الحـرو ف
لي زول حياتو اتبدلت
عاش الربيع بعد الجفـاف
وأيامو ندت وخضرت
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:23 am

نفسى فى نشوة مناها

لما اول مرة شفتك
قلبي لى عينيكا شابا
ونفسى فى نشوة مناها
والمشاعر فى اضطرابا
برضى حسيت انك انتا
منقذ الروح من عذابا
ما العيون مرات بتقرا
قصة الريدة وكتابا

عايزة اكتب عن عيونك
الا غالبانى الكتابة
ما عيونك ليا واحة
وضحكة فى زمن الرتابة

عايزة اكتب عن عيونك
الا ما قادرة اسطر
ما عيونك ليا واحة
وضحكة فى الزمن اليعكر
يالوجودك جمبى راحة
وهدأة الرهق اليفتر
جوه طيفك مالى ساحة
فيها كان الهم معسكر
فى عيونك بلقى عبرة
لما اقراها وافكر
وفيها من جواكا نبره
صوت حنين فيهو ببحر
والامان حافيها سترة
تشتهيها النفس تزهر
والجمال الفيها فطرة
يا بديع الخلق اغفر
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:26 am

للفرقة لا والانفصال

بهواكا ياوطنى العزيز
بهواك معزة ومقدرا
بهواك شمال وجنوب سوى
فيك المكارم مفخرا
ليه التشتت والفِصال
أفكاركئيبة نأصلا
والوحدة ليها الكل سعى
كل المشاها بحصلا
رغبة وقناعة والتزام
نبدأ المسيرة نواصلا
************
للفرقة لا والانفصال
بالوحدة مرحبتين هلا
انا أمى من أرض الجنوب
من منقلا
وابويا من أقصى الشمال
من دنقلا
سودانى جدي و جدتى
ليه الهوية احولا ؟؟!!
جنسية تانى جواز جديد
تأشيرة لابد اعملا ؟؟!!
***********
لما المشاعر تتولد
والبشريات نستقبلا
نسقيها من فيض الحنين
نشتل مداها نجمِلا
ولما المصالح تتحد
نحفظ نصون ونعمِرا
ولما الثقافات تمتزج
الروعة أجيال تغمُـرا
سودان فريد قوة وأمان
والوحدة تاج ومنورا
نلغى الفواصل والحدود
رغبة جدودنا نقدرا
مليار وعشرة على الوطن
كم حُبو( باع فينا وشرا)
سودانى نيلى هويتي
دعواتكم فِصالكم بهملا
فى الازرق العاتى العنيد
ببنى السدود واكتِّرا
والأبيض الهادى الوديع
بحرث جروفو واخضرا
وأصلح ضفاف بحر الجبل
وأبنى المشاريع واشتلا
وابسط سهول بحر العرب
للمرعى أحلاّ مشاكلا
بترولنا فاض كفانا زاد
كل الزيادة نصدرا
وبلدنا قوة وتنمية
وحدتنا أصلها مصدرا
وعشمنا نتسالم نعيش
طاقتنا كامنة نفجرا

الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:31 am

للفرقة لا والانفصال

بهواكا ياوطنى العزيز
بهواك معزة ومقدرا
بهواك شمال وجنوب سوى
فيك المكارم مفخرا
ليه التشتت والفِصال
أفكاركئيبة نأصلا
والوحدة ليها الكل سعى
كل المشاها بحصلا
رغبة وقناعة والتزام
نبدأ المسيرة نواصلا
************
للفرقة لا والانفصال
بالوحدة مرحبتين هلا
انا أمى من أرض الجنوب
من منقلا
وابويا من أقصى الشمال
من دنقلا
سودانى جدي و جدتى
ليه الهوية احولا ؟؟!!
جنسية تانى جواز جديد
تأشيرة لابد اعملا ؟؟!!
***********
لما المشاعر تتولد
والبشريات نستقبلا
نسقيها من فيض الحنين
نشتل مداها نجمِلا
ولما المصالح تتحد
نحفظ نصون ونعمِرا
ولما الثقافات تمتزج
الروعة أجيال تغمُـرا
سودان فريد قوة وأمان
والوحدة تاج ومنورا
نلغى الفواصل والحدود
رغبة جدودنا نقدرا
مليار وعشرة على الوطن
كم حُبو( باع فينا وشرا)
سودانى نيلى هويتي
دعواتكم فِصالكم بهملا
فى الازرق العاتى العنيد
ببنى السدود واكتِّرا
والأبيض الهادى الوديع
بحرث جروفو واخضرا
وأصلح ضفاف بحر الجبل
وأبنى المشاريع واشتلا
وابسط سهول بحر العرب
للمرعى أحلاّ مشاكلا
بترولنا فاض كفانا زاد
كل الزيادة نصدرا
وبلدنا قوة وتنمية
وحدتنا أصلها مصدرا
وعشمنا نتسالم نعيش
طاقتنا كامنة نفجرا

الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:34 am

ست الشاي

حقُو ناخد لينا وقفة
في التكافل والتراحم
في التآزر والتعاضُد
وكل شي يِقربنا زُلفي

حقُو ناخد لينا وقفة
في القوانين واللوايح
في التشرد والرِّعاية
ونِعتنِي بِي كُلِّ نُطفة
حقو ناخد ليناوقفة
للافق ننظر نخطٍط
ومانسيب حاضرنا تايه
وما يجينا الجاي صدفة
**************
تِسعة والوالد تَوفي
والرِّزق كان بيتو يِجفي
تسعة يوم ماضاقو إلفة
لا الطعام شبَّع وكفي
الوالدة واصلت المسيرة
صابرة مؤمنة ياحليلا
في ضرا الكرتون مقيلا
لا صديق بي لُُقمة يِلفي
ولا رفيق لي عطشة يَطفي

تسعة والوالد توفي
ووالدة بين كانون ومصفي
بس ياريت الشاي يصفي
والزباين تلقي وصفة
شاي مظبوط حالا يشفي
والقروش تُحسب كتيرة
وللعيال تنفكا حيرة
وللمؤجِر والمديرة
والقسط تدفع أميرة
والدكيكين يلقي خيرا
وتلغي صفحة وتبدا غيرا
والديون قاسية وعسيرة

الوالدة واصلت المسيرة
صابرة مؤمنة ياحليلا
للجمرة والكانون زميلة
الحاجة للاولاد كفيلة
ماهرة سِت شاي وقديرة
والسُلوك راقي وأصيلا
ما بتفكر في جريرة
وما بتهين شرف القبيلة

(وهل تذكرت القبيلة؟
تَحصِّن الأولاد تَعيلا)
لا صديق بي لقمة يَلفي
لا رفيق لي عَطشة يطفي

تسعة والوالد مُفارِق
والوالدة للاسواق تساسق
ولعنة الاسواق تلاحق
والرزق ممحوق وماحق
وللضرورات ماهو لاحق

واليتيمة قوامها شاهق
يومي للوالدة ابترافق
نظرة واغراءات تلاحق

ولسه بتقاوم أميرة
عام وتانى ويوم وليلة
وللزباين ألف حيلة
ومرت السنوات تقيلة
والدة مشغولة وكسيرة
والقبيلة !
ما بتجيب خبر القبيلة !
ولينا مشروعات عليلة
وللزباين ألف حيلة
طرفة واغراآت تقيلة
والنفيس إنهدَّ حَيلا

خارت وانهارت أميرة
واختلت طايعة وكسيرة
****************
ناس مكافحة الرزيلة
رجعوا الانفس جميلة
الا لسه الام كسيرة
**************
دُنيا لما تشيل رفيقك
البآزرك والبِطيقك
الحزُن بزرع دريبك
والليالي تنوح تِشيبك

الصبر بِشفيك يطيبك
بيهو جلِد عنقريبك
وخلي عطر التقوي طيبك
الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:42 am

ياالمسيتى على ترنيمة

في زمن الفرح الـسـافر وعـدى

ياالبددتـي غيوم احزانـى

ياالطليتي فى وقت الشـدة

بشـارة خير من عـالم تانى

ملا وجدانـى وفيا امتدّ

وغنيت ليكى صباح واماسى

الزمن القاسي دريبو انسدّ

وعمري الضاع في تيه ايامو

لقى احلامو وفرهد جدّ

كيف لـى غيرك تانى تسـافر

الامـال يااعطر وردة

ووين من دونك ألقى سعادة

وكيف الروح تقوى وتشتدا

تاكدى لـو فى يـوم جافيتى

وطبع الدنيا رجع واحتدا

الهمـس الدافئ المنى سمعتى

تخيلى كيف يائس مرتدا

وورد الريـد الحاضـنو قليبـي

ذابل وزاوى إذا لابدّ

ياالرفيتى عليا فراشــة

وفرهد ليـك قليبـى الوردة

اسـعدى عيشي رحيق ايامـو

اسـتاذنتو اتفضلـى ردّ

الرجوع الى أعلى الصفحة اذهب الى الأسفل
الباشا




عدد المساهمات : 89
تاريخ التسجيل : 15/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالأحد أكتوبر 16, 2011 7:49 am

أُمى

يمة جد مشتاق ازورك
وفى دريب وادينا أمــشى
وألقى خطوات الطفولة
كبرت والأيام بتمــشى
أحظى بالنبق والتبلدى
أشوف هشابنا وبعض غـرسي
وغنيماتى الرعيتن ..
بلقى فيهن باقى هِـسي ..!!!
ولا فاتن يمه رحلن
زى سواد شعرِى الفى أمــسى
:-
يمه ما مشتاق أشوفك
وانتى صليتي الرغيبة
واقفه بين ايدين الِهك
فى خشوعك للـفريضه
مستقيم دربك لربك
ربي حِيد الشر دريبا
انتى دعواتك حبيبه
للهموم تمسح تنسى
وانتى ما روحك شـفيفه
بى حواسـك سامعة همسي
أسال الله يطول عميرك
في رحابك بلقى نفسي

الرجوع الى أعلى الصفحة اذهب الى الأسفل
علي




عدد المساهمات : 50
تاريخ التسجيل : 17/10/2011

ديوان الشاعر عبدالله عبدالرحمن عبدالله  Empty
مُساهمةموضوع: رد: ديوان الشاعر عبدالله عبدالرحمن عبدالله    ديوان الشاعر عبدالله عبدالرحمن عبدالله  Emptyالإثنين أكتوبر 17, 2011 9:07 pm

تسلم علي الروعة
الرجوع الى أعلى الصفحة اذهب الى الأسفل
 
ديوان الشاعر عبدالله عبدالرحمن عبدالله
الرجوع الى أعلى الصفحة 
صفحة 1 من اصل 1
 مواضيع مماثلة
-
» الشاعر محمّد إسماعيل الرفاعي
» تحذير من الشاعر المدعو هشام الجخ ومن شعره المسموم

صلاحيات هذا المنتدى:لاتستطيع الرد على المواضيع في هذا المنتدى
منتديات القلمونة :: المنتديات العامه :: ::. ملتقى الشعر .::-
انتقل الى: